Matijašević Karamaneo, Antun (1658-1721) [1686], In Budae a Turcarum tyrannide libertatem, versio electronica (), 234 versus, verborum 1555, Ed. Gorana Stepanić [genre: poesis - carmen; poesis - epica; paratextus poetici] [word count] [matiasevcaramaninbudae].
-- f9 --
In Budae a Turcarum tyrannide libertatem assertore invictissimo Leopoldo Romanorum
imperatore semper augusto. Carmen ad illustrissimum et reverendissimum Dominum,
Dominum Danielem abbatem Gradonicum, patricium Venetum, ac Patavinum canonicum, ab
Antonio Matthiasaevio Caramanaeo Dalmata Hissaeo Iuris Vtriusque Doctoris effusum.
Patavii, MDCLXXXVI. Typis Io. Baptistae Pasquati. Superiorum permissu
-- f10 --
Illustrissime, atque reverendissime Domine.
Cum rudis informi Natura recondita massâ,
Et foret incultae vultus inane Chaos
Non bene nota sibi caeco languebat acervo,
Quâ sibi nota foret lucis egebat adhuc.
Sed cum pax concors discordia cuncta diremit,
Compositaeque tulit Sol super ora jubar,
Gratatur vidisse suae fastigia formae,
Phoebeoque suum laudat ab igne decus.
Haec quoque massa meae, molesve ingloria Musae
Nota sibi, gratae conscia lucis, erit.
Hanc te certa petit Sydus sibi grande petenti,
Qui primae Coelum Nobilitatis habes.
Et tuus, in carmen quo docte impellere, Phoebus
Lumine fulgenti per sua metra micet.
Matijašević Karamaneo, Antun (1658-1721) [1686], In Budae a Turcarum tyrannide libertatem, versio electronica (), 234 versus, verborum 1555, Ed. Gorana Stepanić [genre: poesis - carmen; poesis - epica; paratextus poetici] [word count] [matiasevcaramaninbudae].
|