1348. [1340.] In Quintum omnibus maledicum, seque laedi vehementer impatientem.
Quintus amat cuivis passim maledicere, at illi
Si male quisquam unquam dixerit, horribiles
Impatiens laedi, subito exardescit in iras,
Et furit et legum postulat auxilium.
Sed fatuos nemo non ridet jure furores,
Quasque solet, leges, laedere quotidie,
Iratae auxiliumque negant, ultroque minantur,
Ipse prior meruit quod dare, supplicium.